कोपरगावात कमळ फुललं! दुरंगी लढतीत पराग संधान विजयी; महिला मतांचा कौल निर्णायक

The lotus has bloomed in Kopargaon! Parag Sandhan emerges victorious in a two-way contest; women’s votes prove decisive.

भाजप मित्र पक्षांना १९ जागा तर घड्याळाला ११ जागांवर समाधान

कोपरगाव : कोपरगाव नगरपालिकेच्या निवडणुकीत मतदारांनी अखेर स्पष्ट कौल दिला आणि पराग संधान (कमळ) यांच्या पारड्यात विजय टाकला. ६८.१६ टक्क्यांहून अधिक मतदान झालेल्या या चुरशीच्या लढतीत तिरंगी संघर्षाचा फायदा घेत पराग संधान यांनी अटीतटीच्या लढाईत ४०९ मतांनी निर्णायक  विजय खेचून आणला.

निवडणुकीच्या सुरुवातीपासूनच रंगत वाढवत गेलेल्या या प्रचारात शेवटच्या टप्प्यात महिला मतदारांचा कौल निर्णायक ठरला. महिला मतदानात कमळला मिळालेली आघाडी, कोल्हे परिवाराने केलेली प्रतिष्ठेची लढाई, संघटनाची ताकद आणि शिस्तबद्ध प्रचार यामुळे पराग संधान यांची बाजू भक्कम झाली.

घड्याळ चिन्हावर निवडणूक लढवणारे काका कोयटे यांनी नवीन शहर भाग आणि काही वॉर्डमध्ये जोरदार पकड दाखवली. मात्र मशाल व अपक्ष उमेदवारांमुळे झालेले मतविभाजन त्यांच्या अडचणीचे ठरले. राजेंद्र झावरे (धनुष्यबाण) यांनी काही भागात आघाडी घेतली, पण ती संपूर्ण शहरात पोहोचू शकली नाही.

दरम्यान, भरत मोरे (मशाल) आणि विजय वहाडणे (बॅट – अपक्ष) यांनी मिळवलेल्या मतांमुळे लढत तिरंगीच राहिली आणि त्याचा थेट फायदा कमळ उमेदवाराला झाला.

एकूण पडलेले मते

पराग संधान (कमळ) १८५०३मतं ४०९मतांनी – (विजयी)

 काका कोयटे (घड्याळ)१८०९४मतं (पराभूत)

 राजेंद्र झावरे (धनुष्यबाण)३४९६मतं

 सपना मोरे (मशाल)२१७६मतं

विजय वहाडणे( बॅट)५९१मतं

काय म्हणाल्या स्नेहलता कोल्हे

“कोपरगावच्या जनतेने दिलेला हा कौल म्हणजे कोल्हे परिवारावर व्यक्त केलेला निखळ विश्वास आहे. नगराध्यक्षासह पूर्ण बहुमत देत जनतेने स्पष्ट संदेश दिला आहे की विकास, विश्वास आणि सातत्य यांच्याच पाठीशी कोपरगाव उभा आहे,” अशी ठाम प्रतिक्रिया माजी आमदार स्नेहलता कोल्हे यांनी निर्णयाक विजयानंतर व्यक्त केली.

निकाल जाहीर होताच शहरात जल्लोष उसळला. फटाक्यांची आतषबाजी, ढोल-ताशांचा गजर आणि कार्यकर्त्यांच्या घोषणांनी कोपरगावचा परिसर जल्लोषात न्हाऊन निघाला.