एम.आय.डी.सी.ला वाहतूक कोंडीचा धोका; सोनेवाडी प्रवेशद्वारासाठी स्नेहलता कोल्हेंचा आग्रह
MIDC faces the risk of traffic congestion; Snehalata Kolhe insists on a separate entrance for Sonewadi.
सरकारने वेळेत निर्णय न घेतल्यास त्याची जबाबदारी प्रशासनावर
Rajendara C. Salkar, News Portal, वृत्तवेध ऑनलाईन, Fir6Feb.19.40 Pm.By सालकर राजेंद्र
कोपरगाव : शिर्डी–सावळीविहार एम.आय.डी.सी.साठी केवळ एकाच बाजूने प्रवेशद्वार देण्याचा प्रस्ताव म्हणजे भविष्यातील वाहतूक कोंडीला थेट आमंत्रण असल्याची धारदार टीका करत भाजपा नेत्या मा.आ. स्नेहलता कोल्हे यांनी सरकारची भूमिका सवालातीत ठेवली आहे. “उद्योग उभारणीच्या नावाखाली जर नियोजनच अपुरे असेल, तर त्याचा फटका उद्योगांनाच नव्हे तर सामान्य नागरिकांनाही बसणार,” असा रोखठोक राजकीय इशारा त्यांनी दिला आहे.
सध्या एम.आय.डी.सी.चे प्रवेशद्वार सावळीविहार येथेच प्रस्तावित असून, संपूर्ण वाहतूक एका मार्गावर केंद्रीत होणार असल्याने पुढील काळात मोठ्या प्रमाणावर वाहतूक कोंडी अटळ ठरणार आहे. यामुळे कामगारांचे तासन्तास रस्त्यावर अडकणे, उद्योगांच्या मालवाहतुकीला विलंब आणि स्थानिक ग्रामस्थांचे दैनंदिन जीवन विस्कळीत होण्याची भीती कोल्हे यांनी व्यक्त केली आहे. विशेषतः अपघात, आग लागणे, रुग्णवाहिका यांसारख्या आपत्कालीन प्रसंगी एका प्रवेशद्वाराची कोंडी प्राणघातक ठरू शकते, असा थेट सवाल त्यांनी उपस्थित केला आहे.
“औद्योगिक विकासाचा गवगवा केला जातो, पण प्रवेशद्वारासारख्या मूलभूत बाबींमध्येच सरकार अपयशी ठरत असेल तर हा विकास कोणासाठी?” असा राजकीय सवाल उपस्थित करत कोल्हे यांनी सोनेवाडी येथे उत्तर बाजूस स्वतंत्र प्रवेशद्वार देण्याची ठाम मागणी केली आहे.सोनेवाडी परिसरात एम.आय.डी.सी.साठी आवश्यक भू-संपादन आधीच पूर्ण झाले असताना, प्रवेशद्वार न देणे म्हणजे जाणीवपूर्वक दुर्लक्ष असल्याचा आरोपही त्यांनी अप्रत्यक्षपणे केला आहे.
उत्तर बाजूस स्वतंत्र प्रवेशद्वार दिल्यास वाहतुकीचा ताण विभागला जाईल, कामगारांचा वेळ वाचेल, उद्योगांना गती मिळेल आणि कोपरगावच्या युवकांसाठी रोजगाराचा मार्ग अधिक सुलभ होईल, असे त्यांनी स्पष्ट केले. अन्यथा, “आज दुर्लक्ष केले तर उद्या वाहतूक कोंडीवरून जनतेचा उद्रेक होईल,” असा राजकीय इशारा देत त्यांनी सरकारने तातडीने निर्णय घ्यावा, अशी मागणी केली आहे.
ही बाब केवळ प्रवेशद्वारापुरती मर्यादित नसून, कोपरगावच्या औद्योगिक भवितव्याचा प्रश्न असल्याने सरकारने वेळेत निर्णय न घेतल्यास त्याची जबाबदारी प्रशासनावर आणि सत्ताधाऱ्यांवर राहील, अशी टोकदार भूमिका स्नेहलता कोल्हे यांनी मांडली आहे.
Post Views:
2
