“कौशल्यांशिवाय पदवी निरुपयोगी!” — देवेंद्र दंडगव्हाळ यांचा विद्यार्थ्यांना रोखठोक इशारा

“A Degree Without Skills Is Useless!” — Devendra Dandgavhal’s Blunt Warning to Students

एमएसबीटीई प्रकल्प स्पर्धेतून उद्योगाभिमुख शिक्षणावर भर; नवकल्पनांनाच भविष्यात खरी किंमत

Rajendara C. Salkar, News Portal, वृत्तवेध ऑनलाईन,March 27Fir.19.20 Pm.By  सालकर राजेंद्र 

कोपरगाव : आजच्या स्पर्धात्मक आणि तंत्रज्ञानाधारित युगात केवळ पदवी मिळवून चालणार नाही, तर प्रत्यक्ष कौशल्ये आत्मसात केल्याशिवाय विद्यार्थ्यांना भविष्य नाही, असा स्पष्ट आणि रोखठोक इशारा महाराष्ट्र राज्य तंत्र शिक्षण मंडळाचे छत्रपती संभाजीनगर विभागीय उपसचिव देवेंद्र दंडगव्हाळ यांनी दिला.

महाराष्ट्र राज्य तंत्र शिक्षण मंडळ (एमएसबीटीई) प्रायोजित आणि संजीवनी के. बी. पी. पॉलिटेक्निक आयोजित राज्यस्तरीय प्रकल्प स्पर्धेच्या उद्घाटन प्रसंगी ते बोलत होते.

दंडगव्हाळ यांनी ठामपणे सांगितले की, “शिक्षण म्हणजे केवळ पुस्तकापुरते मर्यादित न राहता प्रत्यक्ष उद्योगासाठी तयार होणे आवश्यक आहे. प्रकल्प स्पर्धांमुळे विद्यार्थ्यांना त्यांच्या कल्पना प्रत्यक्षात साकारण्याची संधी मिळते. मंडळाकडून लाखोंची बक्षिसे देणे हा उद्देश नसून, कौशल्याधारित अभियंते घडवणे हेच खरे ध्येय आहे.”

राज्यातील विविध पॉलिटेक्निकमधील ३८ टीम्स या स्पर्धेत सहभागी झाल्या असून, विद्यार्थ्यांच्या नवोन्मेषी प्रकल्पांनी स्पर्धेला वेगळी उंची दिली. प्रथम क्रमांकासाठी १ लाख आणि द्वितीय क्रमांकासाठी ५० हजार रुपयांची बक्षिसे जाहीर करण्यात आली आहेत.

या व्यासपीठावरून तज्ज्ञांनीही विद्यार्थ्यांना स्पष्ट संदेश दिला की, बदलत्या काळात नोकरीपेक्षा कौशल्ये महत्त्वाची ठरत आहेत. त्यामुळे विद्यार्थ्यांनी स्वतःला सातत्याने अपडेट ठेवत, नवकल्पनांच्या माध्यमातून स्वतःचे स्थान निर्माण करणे गरजेचे आहे.

एकीकडे वाढती बेरोजगारी आणि दुसरीकडे उद्योगांना लागणाऱ्या कुशल मनुष्यबळाची कमतरता, या दोन्ही वास्तवाच्या पार्श्वभूमीवर एमएसबीटीईच्या अशा उपक्रमांना विशेष महत्त्व प्राप्त झाले आहे. विद्यार्थ्यांनी केवळ पदवीच्या भरोशावर न राहता कौशल्यांची भक्कम शिदोरी तयार केली, तरच त्यांचे भविष्य सुरक्षित राहील, असा ठोस संदेश या स्पर्धेतून देण्यात आला.