कोपरगाव बाजारपेठेची बाहेरच्यां व्यापाऱ्यांनाही ओढ!” — आ. काळेंचा ठाम दावा

“Kopargaon Market Holds an Allure for Outside Traders Too!” — MLA Kale’s Firm Claim

Rajendara C. Salkar, News Portal, वृत्तवेध ऑनलाईन,March 27Fir.19.00 Pm.By  सालकर राजेंद्र 

कोपरगाव : “पाण्याचा प्रश्न सोडवला, रस्त्यांचे जाळे उभे केले आणि व्यापारी संकुले उभारली… त्यामुळेच आज कोपरगावची बाजारपेठ बाहेरील व्यापाऱ्यांनाही आकर्षित करत आहे,” असा ठाम आणि रोखठोक दावा आमदार आशुतोष काळे यांनी व्यक्त केला. कोपरगाव तालुका व्यापारी महासंघाच्या नूतन पदाधिकाऱ्यांच्या स्वागतप्रसंगी त्यांनी शहराच्या बदलत्या व्यापारी चित्रावर स्पष्ट भाष्य केले.

महासंघाच्या नव्या कार्यकारणीचे स्वागत करताना काळे यांनी केवळ औपचारिक अभिनंदनावर समाधान मानले नाही, तर विकासकामांचा पाढाच वाचत विरोधकांना अप्रत्यक्ष टोला लगावला. “वर्षानुवर्षे प्रलंबित असलेला पाणीप्रश्न मार्गी लावल्याशिवाय बाजारपेठेला चालना मिळू शकत नव्हती. तो प्रश्न सोडवल्यानंतरच व्यापाराला खरी गती मिळाली,” असे त्यांनी ठासून सांगितले.

शहरातील मुख्य आणि अंतर्गत रस्त्यांचे जाळे मजबूत केल्यामुळे दळणवळण सुरळीत झाले असून याचा थेट फायदा व्यापाऱ्यांना होत असल्याचे त्यांनी नमूद केले. “रस्ते झाले, पाणी आले आणि व्यापारी संकुले उभी राहिली—म्हणूनच कोपरगावची बाजारपेठ आता गजबजू लागली आहे,” असे सांगत त्यांनी विकासकामांची मालिका अधोरेखित केली.

दरम्यान, नव्या कार्यकारणीत अनुभवी नेतृत्वासोबतच युवा व्यावसायिकांना संधी दिल्याबद्दल त्यांनी समाधान व्यक्त केले. “व्यापाऱ्यांचे प्रश्न तळमळीने सोडवणारी संघटना म्हणून महासंघाची ओळख अधिक बळकट होईल,” असा विश्वास त्यांनी व्यक्त केला.

महायुती शासनाच्या माध्यमातून शहरासाठी भरीव निधी खेचून आणत प्रलंबित प्रश्न मार्गी लावल्याचा दावा करत काळे यांनी विकासाची गती यापुढेही कायम राहणार असल्याचे स्पष्ट केले.

एकीकडे विकासाचे दावे आणि दुसरीकडे वाढत्या अपेक्षा—अशा दुहेरी परिस्थितीत आता नव्या कार्यकारणीसमोर व्यापाऱ्यांच्या प्रत्यक्ष अडचणी सोडवण्याचे मोठे आव्हान उभे आहे. त्यामुळे “बाजारपेठ गजबजली” या घोषणेपलीकडे जाऊन ठोस कामगिरी दाखवणे, हीच महासंघाची खरी कसोटी ठरणार आहे.