ते २७३ निवारा सभासद झाले मालक ; ३५ वर्षांनी मिळाला ७/१२

ते २७३ निवारा सभासद झाले मालक ; ३५ वर्षांनी मिळाला ७/१२

वृत्तवेध ऑनलाईन। Sun4Oct2020
By:Rajendra Salkar,12.15

कोपरगाव : उता-यावर निवारा सहकारी गृहनिर्माण संस्था मर्यादित चेअरमन ओमप्रकाश दादाप्पा तथा काका कोयटे म्हणून नोंद होती. सोसायटी बरखास्त होऊन चार-पाच वर्षे उलटले होते. तरी या उताऱ्यावर सोसायटीचे नाव होते.आज अखेर चेअरमन काका कोयटे यांनी एका छोटेखानी कार्यक्रमात ७/१२ व ८ ड, उतारा वाटप केल्याने ३५ वर्षांनी ते २७३ निवारा सभासद  घराचे मालक झाले आहेत.

रविवारी (४) रोजी सकाळी ९ वाजता निवारा हाऊसिंग सोसायटीच्या वतीने काका कोयटे यांच्या ‘काशिदा’ या बंगल्याच्या आवारात निवारा सोसायटीच्या सभासदांना सातबारा वाटप करण्यात आले. उतारा मिळाल्याने गेल्या ३५ वर्षांपासून सभासद म्हणून असलेले खरेदीदार खऱ्या अर्थाने आज घर मालक झाले. सोसायटीचे संस्थापक काका कोयटे यांच्या हस्ते स्वतःच्या नावाचे उतारे मिळताच सभासदांच्या चेहऱ्यावर आनंद झळकला.

प्रारंभी कै. लक्ष्मीनारायण झंवर व देव सर यांना श्रद्धांजली वाहण्यात आली.

यावेळी बोलताना काका कोयटे
म्हणाले, निवारा हाऊसिंग सोसायटी च्या रूपाने मी चाळीस वर्षापूर्वी पाहिलेले स्वप्न साकार करतांना आलेल्या कडू-गोड अनुभवांचा तसेच या प्रवासात भेटलेल्या प्रत्येक व्यक्तीचा नामोल्लेख करून आठवणींना उजाळा दिला.
काका कोयटे पूढे म्हणाले, आपल्या सामाजिक व राजकीय जीवनाची सुरुवात निवारा सोसायटीच्या माध्यमातून झाली आहे. निवाराने मला एक ओळख दिली. आज आपण शहरासह राज्याच्या सहकार क्षेत्रात काम करीत असलो तरीही ज्यां निवारा सोसायटीने माझ्या राजकीय कारकिर्दीत मला भरभरून साथ दिली माझा प्रत्येक शब्द मानला, त्या निवार्‍याशी आपली नाळ जोडलेली आहे, व ती कायम तशीच राहील. लोकांना स्वतःच्या नावावर घरी हवे होते. अनेक अडचणी होत्या, परंतु माझ्या सहकाऱ्यांच्या मदतीने मी त्या सोडविल्या, आज सभासदांना उतारा देत असताना मला मोठा आनंद होत आहे. त्यामुळे आमची घरे आमच्या नावावर कधी ? आमचे उतारे कधी मिळणार ? असे प्रश्न निर्माण करणारा छोटासा ठिपका आज पुसला गेला आहे. सभासदांना उतारे देताना मोठा आनंद होत आहे. प्रश्न सुटला असला तरी मी निवारा व त्यांच्या ऋणातच राहू इच्छितो असेही ते शेवटी म्हणाले,

यावेळी सोसायटीचे चेअरमन सुरेंद्र व्यास, संचालक अरविंद पटेल, सुरेश भडकवाडे, मधुकर पवार, कोतेसर बाळासाहेब म्हस्के, चंद्रकांत माळी, माजी नगराध्यक्ष सुहासिनी कोयटे, समता इंटरनॅशनल स्कूलच्या मॅनेजिंग ट्रस्टी स्वाती कोयटे, नगरसेवक जनार्दन कदम,नगरसेवक दिपाली गिरमे, बाबासाहेब कापे, खडांगळे, लोहारकर, नेमाणे, शहा, भावसार, अजित सालकर, मिलींद जोशी, किशोर कुलकर्णी, सतिश देशपांडे, सुनील शर्मा, सुतारताई, कर्डकताई, फुलसौंदरताई वाजेवहिनी, बुचकेताई, आदीसह निवारा सोसायटी सदस्य हजर होते. सूत्रसंचालन व आभार संदीप कोयटे यांनी मानले, प्रस्ताविक चेअरमन सुरेंद्र व्यास यांनी केले,तर स्वागत नगरसेवक जनार्दन कदम व दिपाली गिरमे यांनी केले.

निवारा हौसिंग सोसायटी या पुस्तकाचे प्रकाशन करण्यात आले.

चौकट
राजेंद्र सालकर – काकांनी निवारा नावाचे स्वप्न पाहिले व ते पूर्ण केले. तसे निवाऱ्यानेही काकाला भरभरून दिले. मी सातत्याने काकांचा राजकिय विरोधक म्हणून काम केले. काकांनी निवाऱ्यासाठी चांगले काम केले परंतु त्या कामात विरोधक म्हणून सातत्याने प्रश्न विचारून जागे ठेवण्याचे काम करून आम्हीही खारीचा वाटा उचलला आहे. यावर काका म्हणाले, खारीचा नव्हे तुमचा सिंहाचा वाटा आहे, यावर उपस्थित सभासदांनी हसून व टाळ्या वाजवून प्रतिसाद दिला. निवारा सोसायटी उभी करण्यात काकांनी कष्ट घेतले होते. स्वप्नपूर्ती केली ते कौतुकास्पद आहे. मात्र एवढे करूनही घराचे उतारे सभासदांच्या नावावर नसल्याने जो एक छोटासा काळा ठिपका काकांच्या कारकिर्दीवर होता. तो सभासदांना त्यांच्या  नावाने घराचे उतारे देवून आज पुसला गेला आहे.

चौकट
काका कोयटे – निवारा ही हिरे माणिकांची खाण आहे. या निवारातील डॉ. कृष्णा फुलसौंदर यांनी कोपरगाव शहर व तालुक्यातील हजारो कोरोनाग्रस्त रुग्णांना बरे करून खऱ्या अर्थाने कोरोना योद्धयाची भूमिका बजावली आहे. ही त्यांची कामगिरी कौतुकास्पद असून हे पुण्य त्यांच्या सात पिढ्यांना पुरेल अशा शब्दांत डॉ. कृष्णा फुलसौंदर यांचा काकांनी गौरव केला .