भाजपाकडून वर्णी! वाढदिवसाचे ‘गिफ्ट’ की राजकीय वजनाची पावती?

अहिल्यानगरच्या राजकारणात नवा अध्याय; कोल्हे घराण्याच्या प्रभावाला पक्षश्रेष्ठींची शिक्कामोर्तब

पाच जागांवर भाजपाची नावे जाहीर, उमेदवारी आता केवळ औपचारिकता

Rajendara C. Salkar, Portal, वृत्तवेध ऑनलाईन,Apr 29Wed 16.00 Am.By  सालकर राजेंद्र 

कोपरगाव : राज्याचे लक्ष लागलेल्या विधानपरिषद निवडणुकीत भाजपने अखेर आपल्या पाच उमेदवारांची घोषणा करत राजकीय चर्चांना पूर्णविराम दिला. या यादीत अहिल्यानगर जिल्ह्यातील विवेक कोल्हे यांचे नाव झळकताच कोपरगावच्या राजकारणात नव्या समीकरणांची चर्चा रंगली आहे. विशेष म्हणजे वाढदिवसाच्या पार्श्वभूमीवरच विवेक कोल्हे यांना पक्षाकडून आमदारकीची संधी मिळाल्याने हे ‘राजकीय वाढदिवसाचे गिफ्ट’ असल्याची चर्चा सर्वत्र सुरू झाली आहे.

भाजपकडून विधानसभेची संधी न मिळाल्यानंतर संयमाने वाट पाहणारे, शिक्षक मतदारसंघाच्या निवडणुकीत तडफदार झुंज देणारे आणि सातत्याने संघटन मजबूत ठेवणारे विवेक कोल्हे यांना अखेर विधानपरिषदेच्या माध्यमातून पक्षाने मोठी जबाबदारी दिली आहे. त्यांच्या झुंजार, आक्रमक आणि अभ्यासू नेतृत्वाची ही दखल मानली जात आहे.

कोल्हे घराण्याचे सहकार, शिक्षण, कृषी आणि स्थानिक राजकारणातील मोठे योगदान लक्षात घेता ही निवड केवळ वैयक्तिक नसून संपूर्ण घराण्याच्या राजकीय वजनाची पावती असल्याचे बोलले जात आहे. माजी मंत्री शंकरराव कोल्हे यांनी उभा केलेला राजकीय वारसा आणि त्यानंतरची पिढ्यानपिढ्यांची राजकीय पकड याची भाजपश्रेष्ठींनी घेतलेली ही गंभीर दखल मानली जात आहे.

विधानपरिषद निवडणुकीसाठी उमेदवारी अर्ज भरण्याचा शेवटचा दिवस ३० एप्रिल २०२६ (गुरुवार) असून, बलाबलाचा विचार करता भाजपाच्या वाट्याला पाच जागा निश्चित मानल्या जात आहेत. पक्षाने पाचही उमेदवारांची नावे जाहीर केल्याने आता निवड ही केवळ औपचारिकता उरली आहे. त्यामुळे विवेक कोल्हे यांची आमदारकी जवळपास निश्चित मानली जात आहे.

राजकीय विश्लेषकांच्या मते, ही उमेदवारी केवळ एका नेत्याचा सन्मान नाही, तर आगामी विधानसभा आणि स्थानिक स्वराज्य संस्थांच्या निवडणुकांसाठी भाजपने टाकलेली दूरगामी राजकीय चाल आहे. कोपरगाव मतदारसंघात काळे-कोल्हे संघर्षाच्या तिसऱ्या पिढीत सुरू असलेल्या सत्तास्पर्धेला आता नवे वळण मिळणार असल्याचे स्पष्ट संकेत यातून मिळत आहेत.

वाढदिवसाच्या निमित्ताने मिळालेली ही राजकीय भेट विवेक कोल्हे यांच्यासाठी केवळ पदाची नाही, तर भविष्यातील मोठ्या नेतृत्वाच्या दिशेने उघडलेले दार मानले जात आहे. भाजपने दिलेली ही संधी ते कितपत भांडवलात रूपांतरित करतात, याकडे आता संपूर्ण जिल्ह्याचे लक्ष लागले आहे.

चौकट 

विशेष म्हणजे गुरुवार हा श्रद्धा आणि सबुरीचा संदेश देणाऱ्या शिर्डीच्या साईबाबांचा पवित्र दिवस मानला जातो. अशाच गुरुवारी विवेक कोल्हे यांच्या उमेदवारी अर्जाचा शेवटचा दिवस येत असल्याने या राजकीय घडामोडीला अधिकच प्रतीकात्मक महत्त्व प्राप्त झाले आहे. संयम, प्रतीक्षा आणि योग्य वेळी मिळणारे फळ हा साईबाबांचा संदेश मानला जातो; आणि विधानसभेची संधी हुकल्यानंतरही शांतपणे पक्षनिष्ठा जपत योग्य क्षणाची वाट पाहणाऱ्या विवेक कोल्हेंना विधानपरिषदेची मिळालेली संधी ही अनेकांच्या दृष्टीने ‘श्रद्धा-सबुरीचे फळ’ ठरत असल्याची चर्चा राजकीय वर्तुळात रंगली आहे.