शेतकऱ्याला  शेतमाल  कवडीमोल भावाने  विकावा लागतो ;  हमीभाव केंद्र  सुरु करा – आ.आशुतोष काळे

 ५२ कोटी २१ लाखाचे अनुदान       शेतकऱ्यांच्या खात्यात जमा  

कोपरगाव : शेतकऱ्यांनी उत्पादित केलेल्या मालाला उत्पादन खर्चाच्या तुलनेत शेतकऱ्यांना अपेक्षित असलेला दर मिळणे आवश्यक आहे. मात्र हमीभाव केंद्र उपलब्ध नसल्याने शेतकऱ्यांना गरजेमुळे  आपला शेतमाल नाईलाजास्तव कवडीमोल भावात विकावा लागतो. त्यामुळे शेतकऱ्यांचे आर्थिक नुकसान होत आहे. त्यासाठी कृषी उत्पन्न बाजार समितीने यापुढे कोणत्याही सबबी पुढे न करता लवकरात लवकर हमीभाव केंद्र सुरु करावे अशा स्पष्ट सूचना आमदार आशुतोष  काळे यांनी बाजार समिती प्रशासनाला  जनता दरबारातून दिल्या  आहेत.

कृषी विभाग, सामाजिक वनीकरण, वन विभाग, कृषी उत्पन्न बाजार समिती, शेती महामंडळ आदी विभागाच्या प्रश्नांचा आढावा घेण्यासाठी आयोजित करण्यात आलेल्या जनता दरबारात ते बोलत होते. यावेळी अनेक शेतकरी व नागरीकांनी त्यांना सबंधित विभागाशी येत असलेल्या अडचणी मांडल्या.